Договорот меѓу Македонија и Грција ќе се потпише во недела

Договорот меѓу Македонија и Грција за решавање на спорот за името ќе се потпише во недела, информираше владиниот портпарол Миле Бошњаковски, по неколкуте верзии што денес ги пласираа и македонските и грчките медиуми.

Настанот, рече Бошњаковски, ќе биде поделен на два дела – едниот е потпишувањето на договорот што ќе се случи на грчка територија, а вториот е средба и ручек на македонска територија.

Договорот ќе го потпишат министрите Никола Димитров и Никос Коѕијас, а на потпишувањето ќе присуствуваат и премиерите на двете земји, Зоран Заев и Алексис Ципрас.

Точната локација и време на потпишување на договорот ќе се знае утре по 18 часот.