Сенаторот Рон Џонсон е во посета на Скопје

Американскиот сенатор Рон Џонсон, кој е коспонзор на резолуцијата на Сенатот за поддршка на Договорот од Преспа денеска престојува во посета на Скопје.

Џонсон во претпладневните часови ќе се сретне со премиерот Зоран Заев, а највена е и средба со претседателот на Собранието, Талат Џафери.

Сенаторот Џонсон во земјава доаѓа во период на интензивни дипломатски активности пред претстојниот референдум, на 30 септември. Вчера во Скопје престојуваше германската канцеларка Ангела Меркел, а изминатите денови беа и генералниот секретар на НАТО, Јенс Столтенберг, министерот за надворешни работи на Луксембург, Жан Аселборн, австрискиот канцелар Себастијан Курц.

Џонсон, кој е претседавач на сенатската Комисија за државна безбедност, освен Македонија, ќе ги посети и Грција, Србија и Косово.

Сенаторот Џонсон е еден од високо рангираните соработници на американскиот претседател Доналд Трамп, задолжен за специјални мисии. Воедно, тој е и претседавач со Поткомитетот за европска и регионална безбедносна соработка.

Републиканскиот сенатор од Висконсин, последен пат престојуваше во регионот во февруари, кога ги посети Белград и Приштина.

Џонсон во своите јавни настапи се залага за поголем ангажман на Вашингтон на Балканот и за интеграција на земјите од регонот во ЕУ и НАТО.