Киријакос Мицотакис ќе го почитува Договорот од Преспа

Грчкиот премиер Киријакос Мицотакис на денешната средба со германската канцеларка во Берлин ќе го пренесе ставот дека Владата на Грција ќе го почитува Договорот од Преспа, објавува „Екатимерини“.

– Што се однесува до договорот за името од Преспа, Мицотакис ги има сите причини да го истакне својот став дека грчката надворешна политика е стабилна и оти тој ќе го почитува секој договор потпишан од претходната администрација, наведува „Екатимерини“.

Привлекување директни странски инвестиции, презентација на претставувањето на владиниот план за реформи и развојните активности на Грција во текот за следната деценија (2020-2030) кои ќе се прошират меѓу другото и во секторите животна средина и енергетика, според грчки владини извори е целта на посетата на Кирјакос Мицотакис на Берлин и денешната средба со Ангела Меркел, jави дописничката на МИА од Атина.

Грчкиот премиер и германската канцеларка ќе разговараат и за прашањата што се однесуваат на сегашноста и иднината на Европа, како што се безбедноста и соработката во југоисточна Европа и улогата на Грција во соседството и ЕУ, а ќе стане збор и за конкретни теми како што се грчко – германските економски контакти, мигрантското прашање и односите со Турција.

Според истите извори посетата на Мицотакис на Берлин и средбата со Меркел ќе бидат првата страница од новото поглавје.

Премиерот на Грција ќе оствари средба и со заменикот канцелар и министер за финансии Олаф Шолц.