Шилегов: Галиите ќе се дислоцираат, не се безбедни

Новиот градоначалник на Град Скопје, Петре Шилегов, во интервју за „Телевизија 24“ откри дека потпишал налог за дислоцирање на галиите што се наоѓаат во реката Вардар во центарот на Скопје.

– Планот е бродовите да се дислоцираат. Тие се небезбедни затоа што претставуваат определен вид брана во услови кога коритото на Вардар е проектирано за проточни води во наредните 100 години. Доколку дојдат поголеми води, може да дојде до излевање на реката во Скопје – изјави Шилегов.

Според него, најспорно е тоа што овие објекти претставуваат урбанистичка опрема според документацијата издадена од Градот, иако се градби на неколку ката.

Во врска со загадувањето, Шилегов рече дека и во изборната кампања истакнал дека не може да се очекуваат спектакуларни резултати уште во првата сезона.

– Да можеше да се реши, верувајте, ќе го направевме тоа. Проблемот со згадувањето во Скопје е тоа што во изминатиот период немавме системска и систематска борба против него. Загадувањето не може да се реши ако решавате само сегменти, морате да влезете фронтално во трите најголеми причинители, а тоа се возилата, загревањето на домовите и инспекцискиот надзор за градежништвото и комуналниот надзор за палењето. Во првата сезона може да има мерки што нема да го решат загадувањето, но може да го ублажат – додаде Шилегов.

Мета.мк