Излегла да го прошета кучето и пронашла бебе во одвод

Шармејн Киви го шетала  Џорџи кога наеднаш кучето застанало пред еден затворен одвод и почнало да лае. Одводот бил покриен  со бетонска плоча, а под неа се слушало тивко цимолење.

“Отпрвин си помислив дека е маче. Џорџи не престануваше да лае. Се обидов да ја кренам плочата, но беше премногу тешка. Насекаде имаше големи црвени мравки. Излегов на главната  улица  и запрев една кола. Човекот излезе и  ми помогна да ја дигнеме плочата. Кога го видовме бебенцето,  бевме шокирани.  Девојчето беше помодрено и голо. Полека ја кренав, се плашев дека е повредена. Веднаш повикавме брза помош, ” раскажува жената.

Бебето било пренесено во болница, каде е констатирано дека има проблеми со дишењето. Веднаш било ставено на инфузија.

“Господ ми го покажа патот до тоа дете”, вели Шармејн.

” Со Џорџ секогаш се шетаме по другата патека. Овојпат, сосем ненадејно, ја сменивме рутата. Немам објаснување, но мислам дека ова е божје чудо, провидение. Господ сакаше јас да го најдам тоа девојче,”  раскажува жената.

Полицијата на Порт Елизабет, Јужна Африка,  покрена истрага за случајот и објави апел за пронаоѓање на мајката, но засега никој не се јавил.  Во меѓувреме,  состојбата на бебето кое го доби името ” Грејс Април” , е подобрена, а социјалните служби прават напори детето да биде згрижено во семејство.