Фајзер: Нашата вакцина функционира против британскиот и јужноафриканскиот вид корона

Фармацевтскиот гигант „Фајзер“, чија вакцина против ковид-19 се дистрибуира низ целиот свет, ги објави резултатите од новата студија за ефикасноста на оваа вакцина против новите видови на коронавирус.

Според таа лабораториска студија, мутациите на коронавирусот идентификувани во јужноафриканскиот и британскиот вид имаат само мало негативно влијание врз ефективноста на антителата генерирани од вакцината на „Фајзер“.

Антителата произведени по администрација на вакцината биле само малку помалку ефикасни против мутациите во видот идентификуван во Јужна Африка, според резултатите од студијата што сè уште не ја поминала рецензијата.

Истражувачите претпазливи, но оптимистични

Имено, со појавата на новите видови на вирусот, истражувачите се обидуваат што побрзо да утврдат дали постојните вакцини се ефикасни против нив. Студијата на „Фајзер“ е во согласност со резултатите од претходните студии.

Треба да се има на ум дека ова се само прелиминарни резултати. Студијата на „Фајзер“ е спроведена во лабораторија и е тестирана само на дел од мутациите пронајдени во новите видови на вирусот, а не и на самите нови видови. Покрај тоа, истражувачите не заклучиле дали резултатите од најновата студија се статистички значајни.

Во меѓувреме, „Фајзер“ соопшти во соопштението дека „резултатите сугерираат дека не е потребна нова вакцина за новите видови на коронавирус“.