Комисијата за заразни болести со нови препораки: Без маски во затворен простор

Комисијата за заразни болести денеска одржа редовен состанок на кој донесе одлука за намалување на рестриктивните мерки и препорача две нови мерки.

– Предлагаме укинување на задолжително носење маски во затворен простор. Исклучок од оваа мерка се здравствените установи, домови кои згрижуваат лица, аптеките и јавниот превоз. Маските може да се носат само по желба, но задолжително носење не се практикува, велат од Комисијата.

Одговарајќи на новинарско прашање, од Комисијата појаснија дека оваа мерка ќе се однесува и на наставниците, односно и тие повеќе нема да бидат обврзани да носат заштитна маска.

– Се укинува епидемиолошкото следење на контактите и изолацијата на контактите. Ја проценуваме епидемиолошката состојба и предлагаме постепено олабавување на мерките, посочија од Комисијата.

Мерките ќе бидат предложени до Главниот кризен штаб, а доколку таму бидат усвоени ќе се најдат на седница на Владата за усвојување и стапување во сила.