Арнаудов, Илиевски и Дамовски излегуваат од затвор, ќе одат во куќен притвор

Љубен Арнаудов, Богдан Илиевски (Бетмен Велит) и Борис Дамовски ќе излезат од притворот во затворот во Шуто Оризари, потврдија од Апелацискиот суд во Скопје. На шестмина обвинети за настаните во Собранието од 27 април минатата година, судот им ги прифатил жалбите, а мерката притвор им е заменета со куќен притвор и одземање на пасошите. Останатите тројца на кои судот ги прифатил жалбите и од затворски заминуваат во куќен притвор се Јане Ченто, Оливер Радулов и Иван Цветановски. Ваквите решенија одат во прилог на барањето на претседателот на ВМРО-ДПМНЕ Христијан Мицкоски, кој во неколку наврати кажа дека партијата нема да се врати во Собранието се додека не се пуштат сите од притвор.

За поранешниот директор на Бирото за јавна безбедност, Митко Чавков, останува мерката притвор, бидејќи судот му го одбил барањето. Пратеникот Јохан Тарчуловски останува во куќен притвор.

Обвинетите за упадот во Собранието се во притвор речиси четири месеци.Основното јавно обвинителство за гонење на организиран криминал и корупција отвори истрага против триесет и шест лица поради основано сомнение за сторено кривично дело терористичко загрозување на уставниот поредок и безбедноста во врска со настаните од 27 април во Собранието.