Стадионот Младост во Струмица нов квалитетен дом за врвни фудбалски натпревари

Покрај арената Филип Втори во Скопје, Македонија со реновирањето на стадионот Младост во Струмица доби уште еден квалитетен стадион на кој може да се играат натпревари според стандардите на УЕФА и ФФМ.

Стадионот комплетно се реконструираше за само два месеци, целосна инвестиција на Фудбалската Федерација на Македонија, а со поддршка на агенцијата за млади и спорт и општина Струмица. Таму веќе се одигра и квалификацискиот натпревар меѓу Македонија и Албанија кој од организациски аспект беше оценет со највисоки оцени од УЕФА, како и од Албанската Фудбалска федерација.

Благодарение на силната желба, напорна работа и посветеност стадионот Младост, за краток временски период доби: надградба на рефлекторите со нови Филипс рефлектори и осветлување од 1570 лукса, како и инсталација за поставување на back up генератор во случај на снемување на струја.

Беа изградени две нови трибини – Источна и Западна со капацитет од 1200 нови места за седење, се инсталираа комплетно нови столчиња на останатиот дел од стадионот, со комплетна нумерација. Изградени се и нови ТВ Платформи за комплетен пренос на квалификациски натпревар согласно барањата на УЕФА

Целиот стадион, вклучувајќи ги и влезовите е осветлен, а поставена е и инсталација на панично осветлување. Стадионот е под сите безбедносни стандарди за чие добивање беше изработена опсежна документација поврзана со планот за евакуација и сертификатот за безбедност согласно законските прописи и правила на УЕФА и ФФМ. Инсталирани се и камери за мониторинг систем за следење на случувања на и вон стадионот, од посебна контролна просторија. Вработените на стадионот се обучени за редовно одржување на теренот и доведување до врвна форма за што е набавена и нова косилка за трева.

Со комплетното фарбање и освежување стадионот Младост е репрезентативен терен од висока трета категорија, кој овозможува удобност како за посетителите, така и одлични услови за квалитетен натпревар од висок ранг.