Македонското електрично „фиќо“ се најде на страниците на „Њујорк Тајмс“

Првиот електричен автомобил ЗАС Г20 произведен и развиен во нашата земја се најде на страниците на „Њујорк тајмс“ опишувајќи го како трансформација на малиот култен автомобил „застава 750“ од времето на социјализмот во возило од електричната ера.
ЗАС Г20 е развиен како производ од проектот „Замена на мотор со внатрешно согорување на класичен автомобил фиќо со електричен мотор“ на компанијата ББ Класик карс, добитник на грант од Фондот за иновации и технолошки развој.

Бензинскиот мотор е заменет со електричен мотор кој го произведува германската компанија Кеслер, која е браунфилд инвестиција во Македонија, и има нулта емисија на јаглероден диоксид. Цената е околу 20 илјади евра, пишува „Њујорк тајмс“.

При презентацијата на автомобилот во Македонија во февруари годинава од ФИТР истакнаа дека преку мерките од Фондот компанијата ББ Класик Карс ќе добие поддршка во вредност од околу 7 милиони денари, додека сопственикот ќе учествува со 3 милиони денари за да се реализира во целост проектот за автентичен електричен автомобил.

Со едно полнење може да помине до 150 километри во реални услови на возење, а полнењето трае околу три часа на домашен штекер, додека на брз полнач полнењето трае само 15 минути, додава Китановски и објаснува дека тоа би било помалу од 1 евро за три часа полнење на батеријата со капацитет од 10 киловати.