ОБАМА ЈА КРИТИКУВА БЕЛАТА КУЌА: АПСОЛУТНА КАТАСТРОФА, НЕ ЗНААТ ШТО ПРАВАТ
Поранешниот американски претседател Барак Обама уште еднаш ја критикуваше Белата куќа за начинот на управување со тековната криза со пандемијата од коронавирус.
Тој оцени дека многумина во администрацијата „не знаат што прават“.
„Повеќе од било што, оваа пандемија конечно покажа дека многу функционери во администрацијата не знаат што прават и дека некои од нив воопшто не се преправаат дека се компетентни“, рече Обама на годишнината од дипломирањето на студентите на HBCU преку видео линк.
Ова е втор пат поранешниот американски претседател, којшто не учествува активно во политичкиот живот од напуштањето на функцијата, да ја критикува сегашната администрација, пишува „Гласот на Америка“.
Минатата сабота, во своето обраќање пред средношколците, тој зборуваше за „таканаречени возрасни, со фенси работни места и титули кои го прават она што е пожелно и лесно – поради што ситуацијата е толку лоша“.
Обама не го именуваше Доналд Трамп во ниту едно од неговите обраќања до студентите и средношколците, но пред еден месец оцени дека одговорот на администрацијата на Трамп на пандемијата е „апсолутна катастрофа“.
Сето ова укажува на тоа дека Обама сака поактивно да се вклучи во кампањата за следните избори, во кои го поддржа демократскиот кандидат Џозеф Бајден, кој беше заменик претседател во неговата администрација.
Покрај пандемијата, поранешниот претседател зборуваше и за убиството на Афроамериканецот Ахмад Арбери, во февруари годинава во Џорџија додека џогирал.
„Да бидеме искрени: ситуации како оваа пандемија ги изложуваат нееднаквостите и оптоварувањето со кое се носат црните заедници во Америка. Ние гледаме дека пандемијата го удира нашето општество нерамномерно, исто како што гледаме дека Афроамериканец кој оди на џогирање и некои луѓе мислат дека можат да го застанат и да го испрашуваат, а потоа да го убијат затоа што тој не сака да одговори на нивните прашања. Неправедноста не е нова работа. Она што е ново е што оваа генерација верува дека статус-квото не може да преживее и сака да ја подобри ситуацијата“, рече Обама пред студентите на HBCU.
Поранешниот претседател им рече на студентите дека тие ќе бидат тие што ќе го направат светот подобро место и апелираше до нив да не се плашат и покрај сегашните предизвици.
„Оставете го назад стариот начин на размислување и нештата што нè делат – сексизмот, расните предрасуди и статусот, алчноста – и го насочуваат светот на друг начин“, рече поранешниот претседател на САД.
