Шефот на „Бионтек“ прогнозира крај на пандемијата до средината на 2022

Компанијата води преговори со Кина со цел вакцината на „Фајзер/Бионтек“ да биде достапна во земјата како еден вид додаток на кинеските вакцини, особено за вакцинирање на стари лица.

Шефот на фармацевтската компанија „Бионтек“ Угур Сахин говорејќи на Самитот на извршни директори во организација на Волстрит џурнал откри кога светот може да се ослободи од заштитни маски, карантин и затворање, и да се врати во „нормалниот“ живот.

– Треба да обезбедиме навистина високо ниво на вакцинација низ целиот свет. Во спротивно, никој нема да биде безбеден. До средината на 2022 година, дури и многу густонаселени региони, како што е Индија, може да постигнат висок степен на вакцинација и имунитет на стадо. Во следните 12 месеци ќе видиме се поголем број на индустриски, сиромашни и земји во развој кои ќе успеат да ја постигнат оваа цел – рече Сахин.

За да се постигнат овие цели, ќе биде потребно да се зголеми производството на вакцини, но и да се почне мешање на различни вакцини против ковид-19.

– Колку повеќе вакцини имаме, толку подобро … Теоретски можеме да ги мешаме затоа што на крајот нашата цел е да постигнеме имунитет на стадо. Сакаме да имаме што повеќе вакцинирани луѓе – додаде Озлем Туречи, коосновач на компанијата и главна лекарка во „Бионтек“.

Таа исто така откри дека тие водат преговори со Кина со цел вакцината на „Фајзер/Бионтек“ да биде достапна во земјата како еден вид додаток на кинеските вакцини, особено за вакцинирање на стари лица.

Translate »