Грчката ЕРТ: Нимиц наскоро ќе ги посети Атина и Скопје

Посредникот на Обединетите нации во спорот за името на Македонија, Мeтју Нимиц, има намера во следните десет дена да ги посети Атина и Скопје, за со нив да го разгледа ова прашање, соопшти грчката телевизиа ЕРТ.

Медиумот забележува дека дипломатот е оптимист и смета дека проблемот за името на Македонија може да се реши во следните шест месеци.

Нимиц посочува дека предлозите што минатата недела ги упатил и претставил во Њујорк на стартот од преговорите се општоприфатиливи за двете земји, и дека дал уверување оти тие го гарантираат „националниот идентитет“ на поранешната југословенска Република Македонија (БЈРМ).

Американскиот заменик-помошник државен секретар Хојт Брајан Ји за агенцијата Блумберг изјави дека двете земји имаат реална шанса, веројатно, најдобрата досега, да го решат својот спор за името на Македонија.

Во Атина и Скопjе има политичка волја и верувам дека решението е достижно, посочи Ји.