Заев: Можеби ние ќе ѕвониме кон Атина
Премиерот Зоран Заев денеска изјави дека спорот за името меѓу Македонија и Грција ќе се реши многу брзо.
За разговорот со грчкиот премиер Алексис Ципрас, Заев одговори дека ѕвонењето на телефонот можеби ќе биде од македонска страна, но точното време или датум не се знае.
„Можеби ние ќе ѕвониме спрема Атина, и се надевам дека тоа ќе биде многу брзо. Јас не би давал нови коментари освен заедничкото соопштение што беше пуштено преку Министерството за надворешни работи. Тоа кажува дека навистина сме многу блиску, но е многу важно ова да биде одржливо и трајно и да биде сто отсто безбедено за генерациите што доаѓаат и ќе го крепат ова пријателство со договорот што ќе го постигнеме. Како што гледате јас останувам оптимист иако не е лесно, чуствително е но е многу важно“- рече Заев.
Заев додаде дека тој би сакал телефонскиот разговор да се случи уште утре, но има период до самитот на Европскиот совет на 28 и 29 јуни, а претходно е Самитот на министри на 25 и 26 јуни, и како што кажа, тие се отприлика роковите и поради овие рокови се очекува ден поскоро спорот да биде завршен.
