Кривична пријава за скопјанец кој се заканувал на пратеници преку социјални мрежи

Против А.Н. (38) од Коњари, Скопско, полицијата до Основно јавно обвинителство Скопје ќе поднесе кривична пријава поради споделена објава-коментар на социјалната мрежа Фејсбук со која предизвикал загрозување на сигурноста на пратеници во Собранието на Република Македонија и поради ширење расистички и
ксенофобичен материјал по пат на компјутерски систем, информираа од СВР Скопје.

Кривичната пријава од СВР Скопје, а во соработка со Секторот за компјутерски криминал и дигитална форензика при Министерството за внатрешни работи, е поради основано сомнение за сторено кривично дело по чл. 144 „Загрозување на сигурност“ и по чл. 394-г „Ширење на расистички и ксенофобичен материјал по пат на компјутерски систем“ од Кривичниот законик на Република Македонија.

По издадена наредба од Основен Суд Скопје 1 Скопје, на 21.10.2018 година извршен е претрес на дом и други простории кај лицето А.Н. при што се пронајдени и одземени предмети во интерес на истрагата, а А.Н. е повикан на службен разговор во полициска
станица.

Секторот за компјутерски криминал и дигитална форензика и понатаму ќе продолжи со активностите со цел санкционирање на ваквите случаи. Полицијата ги повикува сите граѓани кои се изложени на вакви закани или сведочат вакви закани, истите да ги пријават во најблиската полициска станица или на адресата cybercrime@moi.gov.mk

Министерството за внатрешни работи соопшти дека нема да толерира закани по живот на граѓани и повици за насилство и ќе ги презема сите потребни мерки за зачувување на јавниот ред и мир.