Не претерувајте со големи дози витамин Ц и цинк: Не само што не помагаат против Ковид-19, туку може да предизвикаат и нуспојави

Првата студија во која под медицински надзор било клинички тестирано дејството на високите дози витамин Ц и цинк на симптомите на Ковид-19 покажала разочарувачки резултати.

Како што е објавено во написот на американските лекари на научната мрежа „JAMA“, не само што големите количини суплементи не им помогнале на заболените туку истите довеле и до непријатни нуспојави.

„Забележани се контраефекти како мачнина, дијареа и грчеви во стомакот, и тоа во група испитаници кои примале високи дози витамин Ц“, пишува во написот.

Истражувањето опфатило уште 3 групи – едната група добивала цинк, другата примала витамин Ц и цинк, а последната била контролна, со вообичаена терапија против коронавирус.

Резултатите биле толку разочарувачки што студијата била прекината предвреме бидејќи станало јасно дека нема ефект од давање мега дози. Пациентите примале 8 гр. витамин Ц дневно, поделено во 2 до 3 дози со јадење и 50 мг. цинк кој го земале навечер или само еден од двата суплементи.

Ниту еден од овие режими на суплементација не дал подобри ефекти, дури напротив – цинкот кај некои предизвикал чувство на метален вкус во устата и сушење на усната празнина, како и мачнина.

Претходните истражувања покажаа дека дневно препорачаната доза на цинк е 40 мг., а дека се што е над 2 гр. витамин Ц дневно може да предизвика низа тегоби. Од ова треба да се исклучат ситуациите кога витамините се примаат интравенозно, што се прави исклучиво по препорака на лекар.