Зошто Македонците ја избираат Малта како свој нов дом?

Како македонски патник што неодамна искуси возбудливо патување до волшебниот медитерански остров Малта, не можам а да не размислувам за енергичната заедница на сонародници кои избраа да ја наречат оваа мала земја свој нов дом. Со ентузијазам размислував за причините зад магнетното влијание што Малта го има врз Македонците што бараат нов живот исполнет со авантури, можности и личен развој, токму таму.

Прво и основно на листата е секако климата на Малта, која има голема сличност со климата во нашата сакана татковина, секако потопла и појужна. Македонците се навикнати да уживаат во топлата прегратка на медитеранското сонце, а прекрасното време на Малта честопати потсетува на нашето. Изобилството на сонце и благите зими создаваат познато чувство и блискост, и овозможува човек веднаш да се чувствува како дома во оваа земја.

Надвор од климата, одлуката на многумина да се преселат во Малта често е поттикната и од перспективни работни места независно од степенот на едукација во матичната земја. Робустната економија на островот, која се карактеризира со разновиден опсег на индустрии, претставува низа можности за многу Македонци кои бараат професионален развој. Без разлика дали се работи за финансии, угостителство, туризам, градежништво или технологија, просперитетните сектори на Малта ги дочекуваат нашите вештини и експертиза со раширени раце. Шансата да работиме во меѓународно опкружување и да соработуваме со професионалци од целиот свет е голема инспирација и мотивација.  

Јазикот, исто така, игра значајна улога во одлуката на многумина да ја изберат Малта за свое дома. Ние, Македонците, во голем број, имаме познавање на англискиот јазик, вештина што е драгоцено богатство во земја каде што англискиот широко се зборува и служи како официјален јазик. Оваа лингвистичка предност ни овозможува беспрекорно да се интегрираме во малтешкото општество, олеснувајќи ја комуникацијата и воспоставувајќи врски со локалното население и со другите иселеници.

Безбедноста и сигурноста во оваа земја не може да се потцени како факт. Ние доаѓаме од земја каде што концептот на лична безбедност неретко е причина за загриженост, од многу аспекти спокојството во Малта нуди вистинска оддишка. Ниските стапки на криминал на островот, топлината и прифаќањето на тамошната заедница создаваат средина каде што семејствата и поединците можат да напредуваат без постојана грижа што ќе се случи утре. Малта зрачи со исклучителна стабилност во секојдневниот живот.

Сепак, покрај практичниот аспект постои и една друга, нематеријална магија која нас Македонците не обединува во љубовта кон Малта, а тоа е поттикот да се истражува и да се нурне во новите култури. Богатата историја на Малта, волшебните традиции и местата заштитени од УНЕСКО што буквално повикуваат да се открие минатото и да се впие живописната сегашност. Од восхитувачките храмови до шармантните улички на Валета и богатата историја на Мдина, тука секој агол ветува по некое откритие, без разлика дали тоа е скриен залив, историско место или шармантно село што чека да биде истражено.

Одлуката на многу Македонци да ја изберат Малта за свое ново живеалиште произлегува од повеќе фактори. Сепак еден фактор отскокнува – а тоа е мирот. Малта им нуди на многу нашинци мирно засолниште, обезбедувајќи бегство од турбуленциите на политиката и корумпираниот систем во сопствената земја. Мирната атмосфера на Малта им овозможува да напредуваат, да ја следат својата мисла, своите идеи и да придонесуваат во ова енергично и инклузивно општество. Без разлика дали е тоа во сферата на бизнисот, уметноста, маркетингот, технологијата или кое било друго поле, Малта е средина каде што Македонците можат целосно да го истражат својот потенцијал, што честопати, во нашата земја е задушен во непотизам, партиски книшки, лоша едукација за децата и комплетна сиромаштија.

Патувањето во Малта пред се, за мене, беше туристичко искуство, но неочекувано, моето срце и душа најдоа трајно место таму. Вистинското прифаќање и топлината што зрачи од овој медитерански скапоцен камен ми создаде непобитно чувство на припадност, како да сум нашла втор дом што ме пречека со раширени раце.

Ирена Јорданова