Љубомир Фрчкоски е избран за нов амбасадор на Македонија во САД
Поранешниот министер за внатрешни и за надворешни работи, Љубомир Фрчкоски, е избор на Владата за иден амбасадор на Македонија во Вашингтон. Како што се дознава, процедурата за обезбедување агреман е почната и се чека одговор од САД.
Македонија нема амбасадор во Вашингтон повеќе од три години, откако измина мандатот на последниот амбасадор Васко Наумовски. Пречка беше несоработката со екс-претседателот Ѓорге Иванов, изборите, како и блокадите на амбасадорите во парламентот од страна на ВМРО-ДПМНЕ.
Испразнета е и амбасадата на Македонија во Москва за каде што се подготвува да замине Ненад Колев, дипломат од МНР. Со овие именувања ќе се пополнат најважните испразнети амбасади на Македонија, освен таа во Обединетите нации и амбасадата во Брисел, Белгија, каде што требаше да замине Игор Поповски, но поради семејни проблеми, по сѐ изгледа испаѓа од комбинација. Неофицијално, за таа позиција се борел миленикот на ДУИ, Лазар Еленовски, кој живее во Брисел, но нема работа.
Еленовски беше амбасадор на Македонија во Белгија како кадар на ДУИ, а потоа неколку години специјален пратеник во НАТО – измислена паралелна функција со единствена цел да се згрижи миленикот на владејачката албанска партија. Еленовски се обиде да стане и амбасадор во НАТО, но таа идеја не наиде на разбирање во СДСМ, каде што беше поранешен партиски член, пред да формира сопствена партија и да влезе во коалиција со ВМРО-ДПМНЕ. Тој нема намера да се врати во Македонија, а врските тука ги одржува само за да си обезбеди сретства за живот во Белгија.
