Зара Зафировска: Со тенисот го живеам својот сон!

Зара Зафировска е 13 годишна девојка од ОУ Јохан Хајнрих Песталоци. Талентирана тенисерка која со својата посветеност и желба создава позитивен впечаток.

Амбициозна млада девојка, која досега има освоено повеќе национални тениски првенства за девојчиња до 8,10,11, 12 и 14 години, пасиониран вљубеник во тенисот, и која секое слободно време го користи за да игра тенис. Напорно работи и тренира  за да биде како што вика “најдобрата тенисерка на свoето време”.

После двочасовен тренинг во тенискиот клуб ТОП ТИМ  тенис, поразговаравме со Зара, токму на тениски теми.

1. Од каде љубовта кон тенисот?

-Љубовта кон тенисот започна сосема спонтано, кога од моите родители на подарок го добив мојот прв рекет    

• Од колку години почна да тренираш, колку пати неделно тренираш, и со кого?

– Почнав да тренирам од мојата шеста година.  После паузата од 6-7 месеци поради Ковид 19, тренирам секој ден по 2 часа.  6 дена во неделата со мојот тренер Никола Пановски Ниџо

• За да се биде успешен во било кој спорт, а посебно во тенисот, потребен е талент но и напарна работа. Што е тоа што тебе те мотивира?

– Точно, потребна е напорна работа и многу одрекувања од многу секојдневни задоволства  кои ги имаат повеќето од децата на моја возраст. Мене ме мотивираат најдобрите играчи на денешницата од машка и женска конкуренција, нивната посветеност и желба за победа. Сакам да играм со поискусни тенисери од мене и преку спаринзи да се мотивирам да бидам уште подобра.

• Колку твоите родители те поддржуваат?

– Најголемата и безрезервна подршка ја добивам од моите родители  кои покрај мојот тренер  и мојата напорна работа се најзаслужните за моите успеси. Всушност мојата огромна љубов кон тенисот е благодарение на нив

• Која е твојата омилена тенисерка, а кој омилен тенисер?

-Мојата омилена тенисерка е Аријана Сабаленка, а мој омилен тенисер е се знае единствениот Рожер Федерер 🙂 🙂

• Што за тебе е остварување на сонот?

– Остварување на сонот ми е освојување на Вимблдон против мојата омилена тенисерка и секако Бр. 1 на ВТА