Научниците од Универзитетот во Бристол: Формирањето на нов „суперконтинент“ би можело да доведе до исчезнување на луѓето и сите други цицачи

Формирањето на нов „суперконтинент“ би можело да доведе до исчезнување на луѓето и сите други цицачи кои се уште се живи за 250 милиони години, предвидуваат истражувачите.

Користејќи климатски модели за далечната иднина, научниците од Универзитетот во Бристол предвидуваат дека климатските екстреми ќе се интензивираат откако континентите во светот ќе се спојат во единствен „суперконтинент“, Пангеа Ултима, за околу 250 милиони години.

Откриле дека тогаш ќе биде исклучително топло, суво и практично непогодно за живот за луѓето и цицачите кои не еволуирале за да се справат со продолжената изложеност на екстремни температури, пишува CNN.

Истражувачите симулирале трендови на температура, ветер, дожд и влажност на суперконтинентот и користеле модели на движење на тектонските плочи, океанска хемија и биологија за да ги пресметаат нивоата на јаглерод диоксид.

Откриле дека формирањето на тој „суперконтинент“ не само што ќе резултира со почести вулкански ерупции, ослободување на јаглерод диоксид во атмосферата и затоплување на планетата, туку и дека Сонцето ќе стане посветло, ќе испушта повеќе енергија и дополнително ќе ја загрее Земјата, како што забележаа експертите во написот објавен во понеделникот во списанието „Nature Geoscience“.

„Формирањето на нов суперконтинент ефективно би резултирало со троен удар, вклучувајќи го ефектот на континенталност, посилно сонце и зголемување на атмосферскиот CO2“, рече Александар Фарнсворт, виш научен соработник на Универзитетот во Бристол и главен автор на студијата.

„Широко распространетите температури меѓу 40 и 50 степени Целзиусови и уште поголеми дневни екстреми, придружени со високи нивоа на влажност, на крајот би ја запечатиле нашата судбина. Луѓето – заедно со многу други видови – би умреле поради нивната неможност да ја исфрлат оваа топлина преку потење и нема да можат да ги изладат своите тела“, додаде Фарнсворт.

Иако постојат значителни несигурности кога се прават предвидувања за далечната иднина, научниците предупредуваат дека изгледите се„исклучително мрачни“, со проценки дека само осум до 16% од копното на суперконтинентот ќе биде погодна за живот на цицачи.

Нивоата на јаглерод диоксид би можеле да бидат двојно повисоки од сега, според извештајот, иако таа пресметка се заснова на претпоставката дека луѓето сега престанале да користат фосилни горива. Во спротивно, како што истакна Бенџамин Милс, професор по еволуција на системот на Земјата на Универзитетот во Лидс и коавтор на извештајот, со тие бројки ќе се соочиме многу порано, како што се наведува во соопштението.

Оваа мрачна перспектива не треба да поттикнува самозадоволство пред актуелната климатска криза, предупредуваат авторите на извештајот. Климатските промени предизвикани од човековите активности веќе предизвикуваат милиони смртни случаи ширум светот секоја година.

„Важно е да не се изгуби од вид нашата сегашна климатска криза, која произлегува од емисиите на стакленички гасови“, рече коавторот Јунис Ло, истражувач за климатски промени и здравје на Универзитетот во Бристол. „Иако предвидуваме дека планетата ќе стане непогодна за живеење за 250 милиони години, ние веќе се соочуваме со екстремна топлина која му штети на здравјето на луѓето. Затоа е клучно да се постигнат нето нула емисии што е можно поскоро“, додаде Ло.

Климатските промени се на пат драматично да го преобликуваат животот на Земјата, бидејќи милијарди луѓе и други видови се приближуваат до точката каде што повеќе нема да можат да се прилагодат доколку глобалното затоплување не биде значително забавено. Ова беше истакнато во сеопфатниот извештај објавен минатата година под покровителство на ОН.

Научниците со децении предупредуваат дека е од клучно значење да се одржи порастот на температурата на морето под 1,5 степени Целзиусови во споредба со прединдустриските нивоа. Прозорецот на можности да се намали зависноста од фосилните горива и да се избегнат катастрофални промени кои целосно би го преобликувале животот каков што знаеме брзо се затвора.

Последното масовно истребување се случило пред приближно 66 милиони години, кога астероид удрил во Земјата и предизвикал изумирање на диносаурусите и најголемиот дел од животот на планетата.