Заев изрази жалење што неговото интервју за „БГНЕС“ предизвика толку негативни емоции. Но порачува “Дајте да живееме денес”
Премиерот Зоран Заев изрази жалење што неговото интервју за „БГНЕС“ предизвика толку негативни емоции, кои вели дека ги разбира.
– Никој не ги прашал Бугарите на референдум, за да можеме денеска цела Бугарија да ја квалификуваме како фашистичка – рече Заев, образложувајќи ги неговите ставови од вчерашното интервју.
Тој наведе дека и во Македонија имало соработници на окупаторите.
– Во исто време имам обврска кон македонските граѓани да поттикнам придвижување кон решение. Треба да се соочиме со тие прашања од историјата и да развиеме капацитет за простување. Европските народи се договорија да не заборават, но да си простат – рече Заев.
Тој вели дека во 1948 се разладиле односите во тогашна Југославија и Бугарија и постоела железна завеса. Премиерот заедничката историја со Бугарија ја гледа во тоа што според него, во историјата имало луѓе што истовремено се чувствувале и како Македонци и како Бугари.
Заев за отстранувањето на спомен плочите каде пишува „бугарски фашистички окупатор“ вели дека тоа е во согласност со Договорот за пријателство со Бугарија.
– Во дел од плочите каде што пишувало бугарска фашистичка рака, бугарски фашистички куршум е оставено фашистички куршум, фашистичка рака, затоа велиме да не заборавиме, но низ простувањето да внимаваме. Тоа е направено на цела територија на државата, на многу места, најголем дел надлежни се самите општини – рече Заев.
Премиерот посочи дека не знае дали интервјуто ќе помогне, но оти тој сака да му помогне на македонскиот народ.
– Дајте да живееме денес, време е денес да создаваме историја, историја која обезбедува иднина за младите генерации. Не знам дали ќе помогне интервјуто, сакам да му помогнам на мојот македонски народ – одговори Заев на прашањето дали интервјуто ќе помогне или одмогне во прговорите со Бугарија.
